الراجل الخاين وكيفية علاجه والتعامل معه
مين هو الراجل الخائن ؟
بعد ما شوفنا كتير من المشاكل الزوجية واللي سببها الخيانة الزوجية والكثير من الأبحاث عن أسباب خيانة الزوج اكتشفت شئ خطير جدا .
أن الزوج الخائن هو انسان ضعيف معدوم الشخصية وماقصدش معدوم الشخصية أن شخصيته ضعيفة بالعكس .
انما هو شخص ضعيف متواكل ماعندوش اي احساس بالمسؤولية وماعندوش طموح ولا حافز ولا نظرة مستقبلية .
مالوش هدف في الحياة أقصى طموحه وأهدافه سهرة حلوة أكلة جديدة .
وماعندوش استعداد يفكر انسان عايش حياة من غير اي هدف أو حلم أو طموح .
بيهرب من المشاكل مابيحاولش يدور على حل لأي مشكلة بتواجهه انسان سلبي .
كل مسؤولياته غالبا هتلاقي زوجته اللي بتشيلها عنه هتلاقي مراته بتتحمل مسؤولياتها كزوجة وام ومسؤلياته كرب أسرة واي وزوج .
عنده فراغ لانه مش متحمل مسؤولياته عارف وحاسس بأنه شخص غير سوي وبيحاول يقنع نفسه أنه انسان طبيعي .
بيهرب من الواقع الحقيقي بأنه يعيش شخصيه غير شخصيته يزوق نفسه كدا بالبلدي يضيف لنفسه قوى ومزايا مش موجودة فيه ويعيشها مع ست تانية .
وفيه منهم مش بيخون من اجل الخيانة ولكن من أجل أن يحس برجولته يملأ فراغه يعيش شخصية تانية خالص غير شخصيته .
فتلاقيه انسان رومانسي لانه عارف ان اي ست في الدنيا بينقصها الحنان والاهتمام .
ولانه انسان مريض بدل ما يحاول يعيش حياته بشكل طبيعي بيهرب من الواقع بخيال تاني ويصور لنفسه أن هي دي شخصيته الحقيقة .
وطبعا بتعجبه لان الست التانية هي كمان انسانة بتشبهه خائنة ومريضه وبتقنع نفسها أن من حقها تحس انها ست وأنها تلاقي الحنان والحب والرومانسية اللي هي محرومة منهم فهي كمان انسانه مريضه وفقدت الاحترام احترامها لنفسها طبعا واحترامها لذاتها .
تنازلت عن حياءها وكبرياءها وأصبحت لعبه في ايد الشيطان يصورلها كل المحرمات على أنها حق مكتسب .
لا ومعظمهم سواء راجل أو ست بيشوف نفسه ضحية وأنه انسان مظلوم وأنه ضحية الإهمال وأنه كراجل حقه أنه يحس بالاهتمام والعناية وأنه يكون المحور الأساسي في الحياة .
وكان الأسرة أو البيت دا ما فيهوش اي شخص غيره هو اللي لازم يكون محور الاهتمام الاول والأخير هو الوحيد اللي ليه الحق والباقي دوره بعده دا إذا كان شايف أن ليهم الحق أساسا في العناية والاهتمام .
راجل مريض عايش الوهم ضعيف أمام رغباته وشهواته اللي هو نفسه مقصر فيها مع زوجته لكنه مش شايف التقصير دا لانه اصلا مش مهتم بواجباته ومسؤولياته أمام زوجته .
وشايف أن مش من حقها كانسانه أنها تشتكي أو تطالب بأى حق من حقوقها لان هي نفسها من وجهة نظره مقصرة في حقه ولو سالته يقولك أنها السبب أنه بيخون .
وانها على طول مهملة في نفسها ومش مهتمه بشكلها وماقصره في حقوقه دا طبعا من وجهة نظره .
لكن لو نظرنا بعين العقل والواقع هتلاقي أن الست اللي هو شايفها مقصرة في حقوقه وأنها اهملته هي انسانة مطحونة .
عائشه في دوامة هي انسانه من كتر مسؤولياتها اللي هي بتشيلها مش بس كدا دي كمان بتتحمل مسؤولياته ودور اللي هو اصلا لا يملك القدرة أنه يتحمله .
تلاقيها شايلها هموم الدنيا وبتعافر وتسابق الزمن عشان تعدي بالمركب لبر الامان وماتحسسش اي فرد في الأسرة أنه محتاج لشئ أو ناقصه شئ .
هتلاقيها متحملة مسؤلية بيت ودروس ومذاكرة ومدارس وبتفكر في بكرا ومسؤوليات البيت اللي هي اصلا مسؤولياتها الأساسية .
تلاقيها مابتنامش حتى وهي نائمة تلاقي مخها مابيفصلش بتفكر دا عايز درس ودا عايز مصروف ودا عايز كورس والمدرس دا عايز يزود فلوسه وكل دا كوم ولو فرد ربنا يحفظهم تعب شوية عايز دكتور وعايز متابعة ومواعيد أدوية وأكل مخصوص .
دا طبعا غير العناية والاهتمام بباقي الأفراد في نفس الوقت هتلاقيها شايلة هموم الدنيا فوق دماغها .
تلاقيها كبرت وعجزت قبل أوانها وهي ممكن ماتكونش وصلت ال 40 من عمرها .
تلاقيها نسيت نفسها في وسط الدوامة اللي هي عائشة فيها تلاقيها حتى نسيت طعم الفرح حتى الضحكة ما بتكونش طالعة من القلب .
دائما تكون هي اخر حاجة بتفكر فيها هي نفسها حتى لو جاتلها الفرصه تشتري حاجة تخصها هتلاقيها بتشتري حاجة للبيت .
هي أهملت نفسها من كتر المسؤلية والخوف من بكرا والتفكير في المستقبل أهملت نفسها عشان توفر كل جنيه للأفراد اللي هي متحملة همومهم ومسؤولياتهم .
كل يوم بيعدي عليها مابيختلف كتير عن اليوم اللي قبله ورغم كل اللي هي فيه ماحدش بيفكر فيها ماحدش بيفكر يشكرها وكأنها انسانه اتخلقت بس عشان تفرح وتبسط وتهتم بكل الناس وماحدش حتى يقولها كلمة حلوة.
انسانه نسيت نفسها لدرجة أن الحاجات اللي بتفرحها هي الحاجات اللي تفرح اي فرد من الناس اللي هي شايلة مسؤولياتهم .
يعني تلاقيها مبسوطة يوم ما تشتري هدية لفلان ولا توفر فلوس لفلان اللي كان عايزها عشان يطلع رحلة ويتبسط مع أصحابه ولا تشتري هدية لبنتها ولا حتى فلوس تحوشها وفي الاخر جوزها يخودها بحجة أنها فلوسه من الأساس .
الزوج الخائن هو شخص مش بس ضعيف هو شخص كل طموحاته أنه يوقع الست الفلانية ويبقى مبسوط وحاسس برجولته لما مراته تمسك عليه خيانته وكأنه بيقولها انتي غلطانه انتي مهمله .
الزوج الخائن هو شخص قرر يهرب من كل واجباته وعارف أنه عنده نقص فقرر يداري النقص دا ويظهر في شخصية الراجل الجنتل مان اللي مافيش حد زيه الرومانسي الحنون اللي بيضحك ويهزر ويحب ولعب ويغني مع كل الستات الا مراته .
قرر أنه يكون محط اهتمام كل الستات اللي تشوفه تتمنى أن الشخص دا كان هو اللي يكون جوزها مش اللي هي تجوزته وطبعا هو كمان لازم يحسسها أنها مافيش زيها في الدنيا وأنها خسارة في جوزها وأنه مايستهلهاش وأنها تستاهل راحل يقدرها ويسعدنا ويحس بيها .
ولأن هما الاتنين الراجل الخائن والست الخائنة مش اكتر من لعبه بين ايد الشيطان .
ولأنه الاتنين شخصيات ضعيفة ونفوس مريضة وزينوا لنفسهم طريق المعصية والكبائر بيلاقوا بعض بسهوله وبيعيشوا مع بعض الحياة المزيفة اللي كلها ذنوب ومعاصي .
حياة بيهربوا فيها من الواقع اللي هما رفضينه مش عشان هما مظلومين لا عشان هما اشخاص ونفوس مريضه بتحب المعاصي وبتصتصغر الذنب .
طيب ايه الحل ؟
الحل انك كسيدة وربة منزل وانثى وحطي تحت انثى دي مليون خط انك تحبي نفسك تدلعي نفسك تهتمي بنفسك ماتنسيش نفسك .
اتحملي مسؤولياتك انتي بس كام وزوجة وربة منزل كفاية اوي عليكي .
لما تشيلي مسؤولياتك واهتمامتك بس وتحبي نفسك تهتمي بيها هتحبي تكوني جميله هتلاقي عندك وقت ولو قليل تبصي لنفسك في المراية .
لو انتي مااهتمتيش بنفسك مش هتلاقي اللي يهتم بيكي لو طول ماانتي بتنسي نفسك ماحدش هيفكر فيكي ولا يفتكرك.
لازم يكون ليكي وقت مخصص لنفسك يعني تخرجي انتي وزوجك يكون في مشاركة في الكلام لازم يتعود أنه يفتكرك ولو بشيكولاته لازم يفهم انك موجودة
لازم يعرف أن ليكي حقوق وأنه عليه واجبات ومسؤوليات لازم هو اللي شيلها مش انتي .
لان انتي كفاية اوي عليكي مسؤولياتك اوعي تفتكري انك لما تحملي نفسك فوق طاقتها هيكرمومي وهيحبوكي زيادة بالعكس مع الوقت الجبل اللي انتي شايلاه دا هيفرمك ولو قصرتي في واجب من اللي اتعوداي تشيلي هم حتى لو مش مسؤول منك هيلوموكي ويعملوا مشاكل وتكوين مقصرة في نظرهم .
رغم أنها مش من مسؤولياتك ولا صلاحياتك بس دا لمجرد انك عودتهم انك تتحملي كامل المسؤولية شيلي على قدك بس ماتحمليش نفسك فوق طاقتها شيلي واجباتك شيلي مسؤولياتك
وهو يتحمل مسؤولياته كزوج واب ورب أسرة لازم يكون قد المسؤولية ولو يوم قصر في مسؤولياته ماتشيليهاش هو اللي لازم يحس أنه قصر ويتحمل مسؤوليته .
وبعد كدا ومع الوقت باقي أفراد الأسرة هيتعلموا يتحملوا مسؤولياتهم المطلوبة منهم وعوديهم على دا .
ماتربيش اطفال معاقه الطفل لازم يتعلم ينظف مكانه يرتب سريره يغسل شرابه يعلق هدومه مكانها .
افهمي وتعرفي انك انسان مش اله إنسان ليه طاقة ليه مشاعر ليه احاسيس بيتعب وبيزهق وبيمل وبيحب وبيكره وبيعند و يزهق ويرفض .
عيش حياتك اهتمي بنفسك قربي من ربنا اعملي فروضك احفظي فرجك تزيني بالقرآن خليكي حسنة المظهر رائحة عطرة بشوشة .
خلي عندك دائما حسن الاختيار حسن اختيار الوقت الي تتكلمي فيه والوقت اللي تشتكي فيه .
حبي جوزك دلعيه اخلقي لحظات حلوة وموافق بينكوا اعملي ذكريات عيشي حياتك و حبيها وحبي نفسك دلعي نفسك تهتمي بشكلك أتعبني تكوني زوجة وعشيقة وصديقة .
الحياة بنعشيها مرة احنا اللي بأيدينا نعيشها بالشكل اللي احنا نختاره يانعيش دور المظلومين المطحونيين وننسى نفسنا والكل هينسانا يا نكون محور الاهتمام والحب
وبرضو مش هننسى مسؤولياتنا ولا هنهرب منها ومش هننسى الناس اللي مطلوبين مننا وهنفكر في مستقبلهم وحياتهم .
ونفرحهم وتشتري هداية ليهم لكن مش هننسى نفسنا ولا هنستخسر فيها حاجة .
تعليقات
إرسال تعليق